احب المطر واحب ريح الثرىٰ بعده
واحب الديار اللي من الغيث ممطوره
فلا تعرضولي ودّ غيره على ودّه
ولو زانت أوصافه ولو زانت الصورة
احب الغدير اللي على أرض مشتده
تشوف الرمل وسطه تقل در منثورة
احب الربيع اللي زهوره لها مده
واحب الربيع اللي على زفة ازهوره
احب الغصن لا ميلة بالهوىٰ ورده
ليا هب نسناس الهوىٰ فاحت اعطوره
احب البحر والموج في جزره و مده
على صوت موجاته ترى النفس مسرورة
احب القمر لا صار وسط السماء وحده
ودارت فناجيل المهيّل على نوره
احب الصقر في كف صقار ماهده
وانا جاهله بالصيد والبر وصقوره:
احب النهر جاري وانا جالسه عنده
عليه الله انه يخرج القلب عن طوره
احب الطبيعة حب مقدر على عده
لعلي بحب اللي ذكرناه معذورة
احب المدينة في رخا الوقت والشده
لها وسط قلبي منزله غير محصورة
احب المدينة حب ما ينحكر حده
ورىٰ حبها واجب ولآني بمشكوره
وصلوا على اللي ما يجينا نبي بعده
عليه السلام اللي ملا الارض في نوره
ختم ربنا كل الرسالة على يده
وصارت بدينه كوكب الأرض معمورة.
للتواصل مع الكاتبة [email protected]
