ياوخي ليه الشيب بالراس كثران
مدري قهر واللا سوات الطبيعة
بالك يقول انك من الوقت تعبان
والوقت لو ما طاع لازم نطيعه
مدري بلاك الزين مدعوج الاعيان
عين المها راع العيون الوسيعة
وش عاد لا ونه من الحسن فتان
الحر مهما كان نفسه رفيعة
من يشترينا ما نبيعه بالاثمان
ومن باعنا لازم علينا نبيعه
اللي نسيك انساه عساه ما كان
انساه لو فرقى الولايف فجيعه
واصبر على حكم الولي رافع الشان
لوكان تحمل حمل ماتستطيعة
وارج العوض من خالق الكون رحمان
يرحمك لا ضاقت عليك الوسيعة
ما ظنتي من فرّق الشمل ربحان
اللهٰ يقطع من سعى بالقطيعة
وما اظن من يمشي مع الحق خسران
في العرف واللا في حقوق الشريعة
من يعمل الحسنى يجازا بالاحسان
ذكره يشرف والصحايف تذيعه
الله على شرب المهيل استأن
العصر يوم الفي هيف مريعة
لا غرد القمري بعذبات الالحان
والارض خضرا والمناظر بديعه
تينٍ وزيتونٍ ونخلٍ ورمان
هاذا هوى بالي وغاية ربيعه
انسى همومي بين غضات الاغصان
واصير عنها في حصونً منيعة
ليتك تجي وتزورنا يابو سلطان
ليتك تجي لو كان جيه سريعة
لا جيتنا نرضيك لو كنت زعلان
وتنسى عنا وقتٍ يشيب رضيعه
وان كان ذكرتك ونقظت الاحزان
أو جاتكم بالقاف كلمه وجيعه
سامح تراني ضايق البال حيران
لو كنت في نظم القوافي شجيعة
للتواصل مع الكاتبة alkanz2012@hotmail.com
