ياربي ضيوفك بمكة يلبون
لبّيك ياربي وانا وسط داري
ربي بكلمت كن بالكاف والنون
امرك على كل المخاليق جاري
يارب منا ضايق البال محزون
ويخفي حزونه للخلائق يداري
و يارب فينا ساهر الليل مغبون
مظلوم ما عنده رفيقا مباري
وفينا المريض اللي ع الارض مرهون
دايم على الله عند باب الطواري
وفينا الضعيف اللي ورىٰ الباب مسجون
دايم بتفكيره مع الهم ساري
وفينا اليتيم اللي ع القلب مطعون
دايم ودمعه فوق الاوجان جاري
وفينا فقير المال محتاج مديون
يفز من نومه اذا جاه طاري
وفينا وفينا والفرج منك مضمون
يالواحد اللي مال حكمك مباري
ياربنا يالله ياخالق الكون
انت الذي في عالم الخلق داري
كل الخلايق تحت رحماك يرجون
عفوك نهار الكل يا تيك عاري
وصلوا عداد اللي بمكة يطوفون
وعداد ما هبت علينا الذواري
على النبي يا لي لقربه تمنون
بالأخرة عساه جارك وجاري.
للتواصل مع الشاعرة alkanz2012@hotmail.com
